නායකත්වය ගැන උගත හැක්කේ සැබෑ සිද්ධි අධ්‍යයනයන් හරහා ය. මෛත්‍රීපාල සිරිසේන යනු එවැනි අධ්‍යයනයක් සඳහා සිද්ධි සපයන නායකත්වයක් බව අප කලින් ද කීවෙමු. එයට අමතර අනුපාන ලැබුනේ අලුත් ආණ්ඩුවේ කැබිනට් මණ්ඩලය පත් කිරීමත් සමග ය.
හොරු හා තක්කඩියන් බවට සිය දේශපාලන වේදිකාවේ කථිකයන් බොහෝ දෙනෙකු නම් කළ සියල්ලන් සමග මෛත්‍රී ජාතික ආණ්ඩුවක් ගොඩ නැගුවේ ය. ජනතාව ජන්දයෙන් ප්‍රතික්ෂේප කළ අය ද දැන් ඒ ආණ්ඩුවේ නිලතල දරති.
මෙය සාධාරණිකරණය කරන අය කියන්නේ එය උපාය මාර්ගික ප්‍රවේශයක් බව ය. මෙය හෙලා දකින කණ්ඩායම කියන්නේ මෛත්‍රී විසින් තමන්ම ඉහළින් කතා කළ ප්‍රතිපත්ති පාවා දී ඇති බව ය.
උපාය මාර්ගික අවශ්‍යතා වෙනුවෙන් ප්‍රතිපත්ති පාවා දිය හැකි ද? පිරිසිදු ප්‍රතිපත්ති තියාගෙන බලය අර්බුදයකට යවා ගෙදර යා යුතු ද?
මේ ප්‍රශ්න දෙකට පිළිතුරු සපයන්නේ නැතිව මෛත්‍රීගේ ක්‍රියාව විචාරයට ලක් කළ නොහැකි ය.
උපාය මාර්ගික වීම සඳහා ප්‍රතිපත්ති සියල්ල පාවා දීමට වෙනවා නම් ඒ උපායෙන් වැඩක් නැත. අනෙත් අතට ඉතාම පිරිසිදු ප්‍රතිපත්තියක පිහිටා බලය අතහරිනවා නම් එවැනි නායකත්වයකින් ප්‍රයෝජනයක් ද නැත.
මේ හේතුව නිසාම අප කළ යුත්තේ අපේ ප්‍රතිපත්ති සියල්ල එක ගොඩට නොදා ඒවා වර්ග කිරීම ය. එයින් එක් වර්ගයක් වන්නේ කුමන තත්වයක් යටතේවත් අත්හැරිය නොහැකි ප්‍රතිපත්ති ය. උපායමාර්ගික හේතූන් මත හෝ ඒ වර්ගයට අයත් ප්‍රතිපත්ති අත් හැරිය නොහැක්කේ ය. ඒවා කේන්ද්‍රීය ප්‍රතිපත්ති ය. සෙසු ඒවා උපාය මාර්ග වෙනුවෙන් කේවල් කළ හැකි ද්වීතියක වර්ගයේ ඒවා ය. ඒවා පරිවාර ප්‍රතිපත්ති ය.
දැන් අප විමසිය යුත්තේ උපාය මාර්ගික බලය රඳවා ගැනීම වෙනුවෙන් මෛත්‍රී අත්හැර ඇත්තේ කවර ඒවා ද යන්න ය.
මේ ජාතික ආණ්ඩුවට හොරු හා දූෂකයන් ළඟ තබාගෙන හොරකමට දූෂණයට එරෙහිව කටයුතු කළ හැකි ද? එය කේන්ද්‍රීය ප්‍රතිපත්තියක් ද? එය බලය වෙනුවෙන් කේවල් කළ හැකි ද්වීතියක ප්‍රතිපත්තියක් ද?
උත්තර බඳින අයට දෙන්නට තවමත් උත්තර තිබේ. ඒ දූෂිතයන් සමග හවුල් ආණ්ඩුවකට ගියාට ඔවුන්ට විරුද්ධව පර්යේෂණ දිගටම සිදු කරන බව ය. දූෂණ විරෝධී කටයුතු එසේම සිදු වෙතැයි අපි මොහොතකට සිතමු. ඔවුන්ගෙන් කවරෙකු හෝ උසාවියට ඉදිරිපත් කළ දාට කුමක් වනු ඇත් ද? සෙසු අය එවැනි විටෙක ද රැඳෙනු ඇත් ද? පියවර ගෙන ඇත්තේ තමන්ට විරුද්ධව නොවන තාක් ඔවුන් කලබල නොවනු ඇත් ද? නිලමෝර් පියතුමා ලෙස ඔවුන් තමන්ට එරෙහිවනතාක් මුණිවත රකිනු ඇද්ද? එය එසේ නම් උපාය සාර්ථක ය. එසේ නොවුනහොත් උපාය අසාර්ථක ය. එවැනි අර්බුදයක් ඇති වුවහොත් දූෂණ විරෝධී ප්‍රතිපත්තිය අකුලා ගනීවි ද? එය ද්වීතියක එකක් ලෙස සළකා ගනුදෙනු කරනු ඇති ද?
සිද්ධි අධ්‍යයනය සම්පූර්ණ කිරීම සඳහා සිද්ධිය අවසන් නැත.
ඒ නිසාම මෛත්‍රීපාල නායකත්ව විචාරය සම්පූර්ණ කිරීමට තව කල් වැඩි ය.
අවසානයේ ප්‍රතිපත්තියත් පාවාදෙනු ලැබ බලයත් අහිමි කරනු ලැබ සියල්ල අවසන් නොවනු ඇතැයි අපේ පැතුම ය.
Management in Sinhala 