සුජීව සේනසිංහ මන්ත්‍රීතුමා අධිකරණ නියෝජ්‍ය ඇමතිවරයා ලෙස සිටියදී පොලිස් නිලධාරියෙකුට තර්ජනය කළේ ය. එම තර්ජන කිරීම සම්බන්ධයෙන් එතුමාට එරෙහිව පොලීසිය විසින් පවරන ලද නඩුවක් අධිකරණයේ විභාගවීමට නියමිත ය. එබැවින් ඒ සිද්ධිය ගැන විමසීමට මෙහි අදහසක් නැත. එහෙත් එතුමා තම මැදිහත් වීම සමාජය ඉදිරියේ යම් පමණකට සාධාරණය කළේ නිලධාරීවාදය නැවත හිස එසවීමට තමන් ඉඩ නොදෙන බව පවසමින් ය. මේ සටහන ඒ ගැන ය. නිලධාරීවාදය ගැන ය. එයට එරෙහි වීමේ දේශපාලනඥයින්ගේ අපකීර්තිමත් ඉතිහාසය ගැන ය.
නිලධාරීවාදය නරක ය. අහිංසක මිනිසුන්ට තම බලය පෙන්වමින් හිතුමතේ හැසිරුන නිලධාරීන් ප්‍රදර්ශනය කළේ මේ නිලධෘරීවාදය යි. ඒ නිලධාරීන් තම බලය තමන්ගේ හිතේෂීන් ගේ අභිවෘද්ධියට යෙදවූයේ ජනතාව ගැන තඹයකට නොසළකමිනි. එවන් නිලධාරියෙකුට එරෙහිව කරන ලද පැමිණිල්ලක් පවා විභාගයකට ගැනුනේ නැත. ඒ තමන්ගේ සගයින් ආරක්ෂා කිරීමට නිලධාරී පැළැන්තියක් ලෙස ක්‍රියාකරමිින් ඔවුන් කටයුතු කළ නිසා ය.
මහජනතාවට සිදුවුනේ නිලධාරීන්ගේ අකටයුතුකම් වලට එරෙහිව සිය නියෝජිතයන්ගේ පිහිට පැතීම ය.
දේශපාලනඥයන්ගේ අත පෙවීම මෙසේ ආරම්භ වූයේ ජන හිතේෂී මැදිහත් වීමක් ලෙස ය. බල්ලා හා පූසා අතර කේජු කෑල්ල බෙදන්නට ගොස් මුළු කේජු කෑල්ලම කෑ නරියාගේ භූමිකාව දේශපාලනඥයින් ආරම්භ කළේ එසේ ය.
ඔවුන් කළේ නිලධාරීන් නිසි ලෙස බෙදන්නේ නැතැයි අවලාද නගමින් නිලධාරීන් අත තිබු හැන්ද අරගෙන තමන්ටත් තම සගයින්ටත් හත්මුතු පරපුරටත් අඩු නැතිව බෙදීම ය.
දේශපාලනීකරණයේ අජූව ගැන ඊළග යුගයේ නිලධාරීන් පමණක් නොව මහජනයා ද හඩ නගන්නට පටන් ගත්තේ ඒ නිසා ය.යහපාලනය මාතෘකාවක් වූයේ දේශපාලන සටන් පාඨයක් වූයේ ඒ අනුව ය.
ඒ යහපාලනය වෙනුවෙන් පෙනී සිටි දේශපාලනඥයන්ම නිලධාරීවාදයට මුවා වී රට නැවත දේශපාලනීකරණය කරන්නට පෙළඹේ නම් ඒ ගැන විමසුමෙන් සිටිීමට ජනතාව වග බලා ගත යුතු ය.
රෑ වැටුනු වළේ දවල් වැටීමට ජනතාව කැමති වෙතැයි සිතිය නොහැකි ය.
ඒ නිසා සුජීව සේනසිංහ ගරු මන්ත්‍රීතුමාට අප මතක් කර දීමට කැමති වන්නේ නිලධාරීවාදයට එරෙහිව සටන් කිරීම හොඳ වුව ද ඒ මුවාවෙන් නැවතත් දේශපාලනීකරණය කිරීමට කටයුතු නොකරන ලෙස ය.
යම් නිලධාරියෙකු වැරැද්දක් කරන්නේ නම් එයට එරෙහිව පැමිණිලි කළ යුතු ය. ඒ පැමිණිලි නිසි ලෙස විභාග කෙරෙන බවට වග බලා ගත යුතු ය. ඒ සඳහා දැනට ඇති ප්‍රතිපාදන ප්‍රමාණවත් නැත්නම් නව ප්‍රතිපාදන සකස් කළ යුතු ය. කොටින් හා සිංහලෙන් කියතොත් සිස්ටම් (systems) හැදිය යුතු ය.
එසේ නොකොට නීතිය අතට ගැනීමෙන් මේ ගමන යා නොහැකි ය.
මහින්ද පාලනයට වැරදුනේ එතැන ය. යහපාලනය එහෙම වරද්ද ගන්නවා දකින්නට අප කැමති නැත.
(කළමනාකරණ බ්ලොග් සටහනක් ලෙස මෙය පළ කළේ කළමනාකරුවන් ද සමහර අවස්ථාවල මේ උගුලේ වැටෙන බව අප දැක ඇති නිසා ය. පද්ධති (systems) සෑදිය යුතු තැනක ඒ කටයුත්ත ඉවතලා තමන් වටා සියල්ල ගොඩ නගා ගැනීමට තැත් කිරීම ඔවුන්ට ද වැළඳෙන රෝගයකි. ප්‍රතිඵලය සේවක අසහනයත් වෘත්තීය සමිති ශක්තිමත් වීමත් පුද්ගල විරෝධය අවසානයේ ආයතන විරෝධයක් බවට පත්වීමත් ය.)
Management in Sinhala 