රජයේ ක්‍රමවේද නිසා උග්‍ර වන වාහන තදබදය, විදේශ විනිමය අර්බුදය හා මහජනතාවට විඳින්නට වන හිරිහැර


See the source image

වාහන තදබදය, විදේශ විනිමය අර්බුදය, මහජනතාවට විඳින්නට වන හිරිහැර යන මේ සියල්ලට පමණක් නොව මිනිසුන්ගේ කාලය කා දැමීමට ද වගකිව යුතු එක් ප්‍රධාන සාධකයක් වන්නේ ආණ්ඩුවේ පසුගාමී ක්‍රමවේදයන් හා නිලධාරීන්ගේ අමනෝඥ හැසිරීම ය.

ස්වදේශීය කටයුතු අමාත්‍යංශය යටතේ සංචාරක බංගලා ගණනාවක් රට පුරා පිහිටුවා තිබේ. ඒවා රාජකාරී සඳහා වෙන් කර නොමැති අවස්ථාවල පෞද්ගලික කටයුතු සඳහා රජයේ සේවකයන්ට ද විශ්‍රාමිකයන්ට ද භාවිතා කළ හැකි ය. එතෙකුදු ඒවා වෙන් කර ගත හැක්කේ නාරාහේන්පිට පිහිටි ස්වදේශීය අමාත්‍යංශ කාර්යාලයට ශාරීරිකව පැමිණීමෙන් පමණකි. වාහන හිමි රජයේ සේවකයෙකු ඒ සඳහා පොදු ප්‍රවාහන සේවයකින් එතැනට පැමිණෙන්නේ නැත. ඒ හැම වතාවක ම වාහන තදබදය ද විදේශ විනිමය අර්බුදය ද උග්‍ර කිරීමට එම ක්‍රමවේදයන් මගින් සැපයෙන්නේ නොමඳ අනුග්‍රහයකි. සේවා කාලය තුළ පැමිණිය යුතු නිසා වැඩ කළ යුතු කාලයෙන් කොටසක් ද කා දැමීමට එයින් සිදු වේ.

කොළඹ අවට වෙසෙන කෙනෙකුට ඒ සියලු පාපයන්ට අනුග්‍රහ දක්වමින් පැමිණිය හැකි වුව ද පිටපළාත්වල ඉන්නා රජයේ සේවකයන්ට පමණක් නොව විශ්‍රාමිකයන්ට ද එය අමතර හිරිහැරයක් ද වන්නේ ය.

විශ්‍රාමිකයෙකු නම් ඔහු විශ්‍රාම වැටුප් ලබා ගන්නා ප්‍රාදේශීය ලේකම්ගෙන් නිර්දේශයක් ද ලබා ගෙන පැමිණිය යුතු ය. ඔහු තාවකාලිකව දරුවෙකුගේ ගෙදර පදිංචියට ගොස් ඇත්නම් ඒ සඳහා වෙන ම ගමනක් පැමිණිය යුතු ය. මේ සියල්ල අවශ්‍ය වන්නේ අදාළ ඉල්ලුම්කරු විශ්‍රාමිකයෙකු දැයි සැක හැර දැන ගැනීමට ය.

විශ්‍රාමිකයෙකුට හඳුන්වා ගැනීමේ පත්‍රයක් ඇත. එය සංචාරක බංගලා බාරකරුට ඉදිරිපත් කළ යුතු යැයි කොන්දේසියක් පැනවීමෙන් ද ඒ හඳුන්වාගැනීමේ පත්‍රයේ අංකය ඉල්ලුම් පතට ඇතුළත් කළ යුතු යැයි කොන්දේසියක් පැනවීමෙන් ද ඒ අනන්‍යතා ප්‍රශ්නය මග හැර ගත හැකි ය. එහෙත් ක්‍රමවේදයන් සකසන අයට එවැනි සිතුවිලි පහල නොවේ.

ඒ ඇරුණු විට කෙනෙකු පෞද්ගලිකව පැමිණිය යුත්තේ මුදල් ගෙවීමට හා අදාළ වෙන්කිරීමේ ලිපිය ලබා ගැනීමට ය. ඒවා නවීන තාක්ෂණය භාවිතා කර දුරස්ථව කර ගත හැකි කටයුතු ය.

මා මේ සඳහන් කළේ, රජයේ සේවය සම්බන්ධයෙන් බලන කල, ඉතාම කලාතුරකින් යෙදෙන කටයුත්තක් බව ඇත්ත ය. එහෙත් මීට සමාන කටයුතු දහස් ගණනක් රජයේ සේවා ජාලයෙන් අපට සොයා ගත හැකි ය.

මහජන පුස්තකාලයට පොත් සපයා අදාළ මුදල් ලබා ගැනීමේ කටයුත්ත සඳහා සිව්වරක් එහි යෑමට මට සිදු විය. පළමු වතාවේ, පොතේ පිටපතක් අනුමැතිය සඳහා බාර දීමට ය. දෙවනුව, පොත් කිසියම් ප්‍රමාණයක් බාර දීමට ය. තෙවනුව, වවුචරය පිලියෙල කිරීමෙන් පසු මුද්දරයක් ගසා අත්සන් කිරීමට ය. සිව්වෙනුව, චෙක්පත ලබා ගැනීමට ය.

කොළඹ නගර සභාව පමණක් නොව තවමත් ආණ්ඩුවේ බොහෝ තැන් වල මුදල් ගෙවන්නේ චෙක්පත් මගිනි. ඒවා අන්තර්ජාල සම්බන්ධකම් හරහා අදාළ පුද්ගලයාගේ බැංකුවට කෙලින් ම යොමු කරන රජයේ ආයතන ද කීපයක් තිබේ. එයින් අදහස් වන්නේ සෙසු ආයතන වලට ද එය කළ හැකි බව ය. අවශ්‍ය වන්නේ වුවමනාව ය.

සමහර අවස්ථාවල අදාළ ලේඛන නොමැති වුව ද විකල්ප ක්‍රම මගින් අවශ්‍ය තොරතුරු තහවුරු කර ගත හැකි ය. ඔ්ස්ට්‍රේලියාවේ කලක් ජීවත් වූ මට ඒ පිළිබඳ අගනා අත්දැකීමක් ඇත. ඒ මා රජයේ කාර්යාලයකට ගොඩ වැදී යම් සේවාවක් ලබා ගැනීමට යෑමේ දී මගේ අනන්‍යතාවය තහවුරු කරගන්නට එම කාර්යාලයේ වැඩ කළ සේවකයෙකුට වුවමනා වූ විට ය. ඒ සේවකයා මුලින් ම ඇසුවේ මා සතුව රියැදුරු බලපත්‍රයක් තිබේ ද යන්න ය. මා නැතැයි කී විට ඔහු මගේ ගමන් බලපත්‍රය ඉල්ලා සිටියේ ය. එය ද නැතැයි කීවිට මා සේවය කරන ස්ථානයෙන් ලබා දුන් කිසියම් හඳුනාගැනීමේ ලේඛනයක් මා සතු ව තිබේදැයි ඇසුවේ ය. අනන්‍යතාවය තහවුරු කිරීම සඳහා මා සතුව කිසිවක් නැති බව තේරුම් ගත් මම එයින් එකක් රැගෙන නැවත පැමිණෙන්නෙමැයි කීවෙමි. ඔහු කීවේ මා සම්බන්ධ තොරතුරු කීපයක් ලබා දිය හැකි නම් මගේ අනන්‍යතාවය ඔහුට තහවුරු කර ගත හැකි බව ය. ඔහු ඉන්පසු මගෙන් ඇසුවේ මා මගේ නිවසේ පදිංචි වූවේ කුමන කාල වකවානුවේ ද මගේ නමට දුරකථනයක් ඒ සමගම ලබා ගෙන ඇති දැයි කියා ය. මම පදිංචි වූ දින වකවානුත් මගේ දුරකථන අංකයත් ඔහුට ලබා දුන් පසු ඔහු ඒ තොරතුරු එම රටේ ටෙලිකොම් සමාගමෙන් විමසා තහවුරු කර ගත්තේ ය. ඉන්පසු මගේ අනන්‍යතාවය ඔහුට ගැටළුවක් වූයේ නැත. ඒ 1992 වර්ෂය තරම් ඈත කාලයේ දී ය.

මා හිතන ආකාරයට වාහන තදබදය අවම කිරීම, විදේශ විනිමය අර්බුදය ලිහිල් කිරීම හා ජනතාවගේ පහසුව වැඩි දියුණු කිරීම යන කාරණා තුන ම ඉලක්ක කර ගෙන රජයේ ක්‍රියාදාමයන් හා ක්‍රමවේදයන් තාක්ෂණය ද උපයෝගී කර ගනිමින් අප රටේ ද පමා නොවී යාවත්කාලීන කළ යුතු බව ය. එය සේවාලාභීන් වෙනුවෙන් පමණක් නොව රටේ පොදු අභිවෘද්ධිය වෙනුවෙන් ද කළ යුතු කාර්යයකි.

විශේෂයෙන් කෝවිඩ් වසංගත තත්වය යටතේ එහි පැතිරීම අවම කිරීමට එයින් වන දායකත්වය ද සළකා මෙය ඉතා ඉක්මණින් ඉටු කළ යුතු මෙහෙයකි.

3 thoughts on “රජයේ ක්‍රමවේද නිසා උග්‍ර වන වාහන තදබදය, විදේශ විනිමය අර්බුදය හා මහජනතාවට විඳින්නට වන හිරිහැර

  1. K A T Nikapitiya says:

    Very appropriate. Also, the response or feedback for any query by State Institutions is absolutely nonexistent., I could Fw you an E mail I sent to famous DG of SLSI on 2nd Feb (before the Alfotoxin issue) on the inferior quality of 2 brands of Boxes of Matches with SLS Logo asking them to look into this matter on public interest, Gave a call to one of the Director too, but not even an acknowledgment or response.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s