වෙනසකට වීරයන් අවශ්‍ය ය


52578

දීම හොඳ දෙයකි. එහෙත් යමක් දෙන්නට ඒ දෙය පළමුව තමන් සන්තකයේ තිබිය යුතු ය. නැති දෙයක් දිය නොහැකි බැවිනි. ඒ සඳහා තමන්ට ඒ දෙය පළමුව ලැබිය යුතු ය. ආදරය දිය හැක්කේ ආදරය ලද කෙනෙකුට ය.

මවක සිය දරුවන්ට ආදරයෙන් සළකනු ඇත්තේ ඇයට ද තම දෙමාපියන්ගෙන් නැතිනම් අඩු වශයෙන් සැමියාගෙන්වත් ඒ ආදරය ලැබුනේ නම් හා ලැබෙන්නේ නම් ය. පියෙකුට ද එය එසේ ම අදාළ ය.

පොලීසියට මහජනයාට කරුණාවෙන් සැළකිය හැක්කේ පොලීසිය තුළ යටත් නිලධාරීන්ට කරුණාවෙන් සළකන සංස්කෘතියක් ඇත්නම් පමණ ය. තම ප්‍රධානියාගෙන් කුණු බැණුම් අසන පොලිස් නිලධාරියෙකු ඊට පහලින් ඉන්නා නිලධාරීන්ට හෝ මිනිසුන්ට හොඳින් සළකතැයි අපේක්ෂා කරන්නට බැරි ය.

වාරිමාර්ග දෙපාර්තමේන්තුවේ නිලධාරීන්ට ගොවීන්ට ආදරයෙන් ගෞරවයෙන් සංග්‍රහ කළ හැක්කේ වාරිමාර්ග දෙපාර්තමේන්තුව තුළ ඒ සැළකුම් ඔවුන් ලබන්නේ නම් පමණ ය. කඩේකට ගොඩ වදින පාරිභෝගිකයාට දයාවෙන් සේවය සැළසීමට වෙළඳ සේවකයන් සමත් වන්නේ කඩේ මුදලාලි විසින් සේවකයන්ට එසේ සැළකුම් කරන්නේ නම් පමණ ය.

තමන් ඇදේට යන ගමන් දරුවන් කෙලින් යතැයි කකුළුවකු අපේක්ෂා නොකළ යුතු ය. ඒ සඳහා අවවාද අනුශාසනා කිරීම ගඟට ඉණි කැපීමක් පමණ ය.

වතුර ගලන්නේ පහත් තැනිනි. උඩින් එන වතුර රඳවා ගැනීම අමාරු ය. එ් සඳහා ගන්නා උත්සහය මුල දී කාන්දු වීමකින් ආරම්භ වී අවසානයේ බැම්ම ම කඩා ගෙන යෑමෙන් අවසන් වන්නට පුළුවන. උඩින් එන බැණුම් ද මුලදී ටිකින් ටික පහළට කාන්දු වී හිටි හැටියේ අර්බුදයකින් කෙළවර වන්නට නියමිත ය.

ඒ නිසා ඔබ පාරිභෝගික සත්කාරයට ඔබේ සේවක මඩුල්ල යොමු කරන්නට අපේක්ෂා කරන්නේ නම් පළමුව කළ යුත්තේ ඒ සඳහා වැඩ මුළුවක් සංවිධානය කිරීම හෝ ඔබම ඉදිරිපත් වී බණ කීම නොවේ. ඔබ ඒ සත්කාරය ඒ හැටියෙන් ම ඔබේ සේවක මඩුල්ලට පිරි නැමිම ය.

ඔවුන් විසින් ආයතනයට එන පාරිභෝගිකයන් සිනා මුසු මුහුණින් පිළිගත යුතු යැයි ඔබ අදහස් කරන්නේ නම් ඔබ ද ඔබේ සේවකයන් මුණ ගැසෙන විට ඔවුන්ට ද සිනා මුසු මුහුණකින් සංග්‍රහ කළ යුතු ය. ඔවුන් විසින් පාරිභෝගිකයන්ට නිසි ගෞරවය දී ආමන්ත්‍රණය කරන්නේ යැයි ඔබ අපේක්ෂා කරන්නේ නම් ඔබ ද එම සේවකයන්ට නිසි ගෞරවය දී ඔවුන් ආමන්ත්‍රණය කළ යුතු ය.

කුමන හේතුවක් නිසා හෝ පාරිභෝගිකයෙකුට අවමන් නොකළ යුතු යැයි ඔබ අපේක්ෂා කරන්නේ නම් ඔබ ද කුමන හේතුවක් නිසා හෝ ඔබේ සේවකයන්ට එසේ නොකළ යුතු ය. ගත් කටටම නැහැ බැහැ යයි පාරිභෝගිකයන්ට සේවකයන් විසින් නොකිය යුතු යැයි ඔබ අදහස් කරන්නේ නම් ඔබ ද එසේ නොකිව යුතු ය.

ඔබ ඉන්නේ ඉහළම තැන නම් එය ඔබට කළ හැකි ය. කෙනෙකු ඉන්නේ ධුරාවලියේ මැද නම් ඔහු අසරණ වේ. සියලු බැණුම් ඉවසා දරා ගෙන පහලට ඒවා කාන්දු නොවීමට ඔහු හෝ ඇය විසින් වග බලා ගත යුතු නිසා ය. තමන් ළඟින් මේ අටමගලය අවසන් කළ යුතු නිසා ය. ඊට එහා නොයන තිතක් ඊට තැබිය යුතු නිසා ය.

ඒ සඳහා කළ හැකි හොඳම දෙය බැණුමට විරුද්ධ වීම ය. එය නොපිළිගන්නා බව කීම ය. එය බාර නොගන්නා බව කීම ය. එය කළ තැනැත්තාට ම නැවත ආපසු බාර ගැනීමට කටයුතු සැළැස්වීම ය. ඒ සඳහා ඔබට හයියක් තිබේ නම් ඔබෙන් එහාට මේ කුණු බැණුම් යන්නේ නැත. ඔබෙන් පහලට ඒවා ගලන්නේ හෝ කාන්දු වන්නේ නැත. අභිමානයෙන් යුතුව ඔබටත් ඔබට පහළින් ඉන්නා අයටත් සේවය කළ හැක්කේ මේ තීරණයට ඔබට එළඹිය හැකි නම් පමණ ය.

හයිය ඇති කෙනෙකුට ඒ සඳහා තනිවම වුව ඉදිරිපත් විය හැකි ය. එහෙමකට හයියක් නැතිනම් ඒ සම්බන්ධයෙන් කණ්ඩායමක් ලෙස විරෝධය දැක්විය යුතු ය. කණගාටුව බොහෝ දෙනෙකු ඊට බිය වීම ය. කණ්ඩායමක් ලෙස වත් ඉදිරිපත් වීමට බිය වීම ය. ඒ තුළ තමනුත් ආතතියට ලක්ව එහි ඉතිරුම පහලට ද ගලා ගෙන යෑමට ඉඩ දී බලා සිටීම ය.

ආයතනය තුළ සත්කාරක සේවයේ වෙනසක් කිරීමට එක්කෝ වීරයා හැමට ම උඩින් සිටිය යුතු ය. එසේ සිට සත්කාරක සේවය තමන්ට ඊළගට පහළින් ඉන්නා ස්ථරයට ලබා දිය යුතු ය. ඔවුන්ට නිසි සත්කාර දැක්විය යුතු ය. එවිට එය වැඩි ආයාසයකින් තොරව පහළට ගලා යනු ඇත.

එහෙත් අප බොහෝ දෙනෙකුට කුඩා කල දී ඇති තරම් ආදරය නොලැබුණ නිසා දෝ, අපේ දෙමපියන් ද හැඳි නොගා හදන හොද්දත් නොගහ හදන ළමයාත් එක ගොඩකට දැමූ දර්ශනයකින් අන්ධව සිටි නිසා දෝ, බොහෝ දෙනෙකු පුරුදුව සිටින්නේ ම පොඩ්ඩ ඇත්තන් ඩෝං යන්නට ය. තර්ජනාංගුලිය එස වීමට ය. “හොඳම“ වචන වලින් සංග්‍රහ කිරීමට ය.

එහෙව් පරපුරකින් බිහි වූ නායකයන්ගෙන් මේ ශික්ෂණය පැතීම අමාරු ය. එහෙම කියා මුකුත් නොකර සිටියොත් වන්නේ තව පරම්පරා ගණනාවක් මේ ශාපයෙන් දුක් විඳීම ය. අද නතර නොකළොත් එය තවත් පරම්පරා ගණනකට ම ගලා යෑමට ඉඩ ඇති නිසා ය.

ඒ නිසා ලොක්කා මත නොරැඳී, එක වීරයෙකු වෙනුවට, අප මැදිහත් වී, විරයින් දහස් ගණනින් හැදිය යුතු ය. එසේ කොට ලොක්කාගේ කුණු බැණුම් නැවැත්වීමට, ඊට එරෙහිව කටයුතු කිරිමට, අදිටන් කළ යුතු ය. ඒ සඳහා අප ද කටයුතු කරන අතරේ සෙසු අය ද දිරි ගැන්විය යුතු ය. ලොක්කා වීරයෙකු නොවේ නම්, අප කලින් කියූ වීරයන් දහසින් එක් අයෙකු විමට, අද ම අප විසින් විවරණ ලබා ගත යුතු ය. ඒ ලොක්කාගෙන් නොවේ. අප ගෙන් ය. ඒ අපේ සගයන්ට ද ඒ විවරණ ලබා දෙන ගමන් ය.

නිවැරදි ආයතන සංස්කෘතියක් හැදීමේ ශක්තිය ද වගකීම ද හැකියාව ද වඩාත් තිබෙන්නේ නායකයා බවට සැකයක් නැත. එහෙත් අපට එවැන්නෙකු නොලැබේ නම්, ඉන්නා තැනැත්තා එවැන්නෙකු බවට පත් කර ගැනීමේ අමාරු වගකීම දැරීමට ද අපට සිදු වන්නේ ය. එසේ නැතහොත් එය ඔහුගෙන් ඇයගෙන් ගලවා ගෙන අප වෙත ලබා ගත යුතු ය.

එවැන්නෙකු ලැබීමේ ඉඩට වඩා නොලැබීමේ ඉඩ ඇති ලංකාව වැනි රටකට වැටී ඇති අගාධයෙන් ගොඩ ඒමට අප කලින් ද සඳහන් කළ පරිදි වීරයන් දස දහස් ගණනින් අවශ්‍යව ඇත්තේ ඒ නිසා ය.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s