සුපිරි කණ්ඩායමක පසුබිම් කතාව


සමහර කණ්ඩායම්වල සාමාජිකයින්ගේ හැසිරීම අතිශයින් සාධනීය ය.

ඔවුහු එකිනෙකා අදුනති. එක් එක් අය සතු ශක්තීන් ද දුර්වලකම් ද ගැන ඔවුන් සංවේදී වෙති. ඒ ශක්තීන් කණ්ඩායමේ අභිවෘද්ධිය සදහා යොදවා ගන්නේ කෙසේ දැයි සෑම කෙනෙක්ගේම කල්පනාවට හසුවෙයි. එවැනි ශක්තියකින් ප්‍රයෝජන ගන්නට අවස්ථාවක් ලද විට ඒ සදහා අදාළ සමාජිකයාට ඉඩ සැලසීමට පමණක් නොව ඒ සදහා ඉදිරිපත් වීමට ඔහු/ඇය දිරි ගැන්වීමට ද ඔවුහු සූදානමෙන් සිටිති.

සෙසු අය එසේ දුර්වලකම් ඇති සමාජිකයන්ට දුර්වලකම් තුනී කර ගැනීමට උදව් වෙති.

දුර්වල කම් කණ්ඩායමේ දායකත්වයට ප්‍රශ්නයක් නොවන්නට ද ඔවුහු වග බලා ගනිති. උදාහරණයක් ලෙස කෙනෙකුට අදහස් ප්‍රකාශ කිරීමට අවශ්‍ය කුසලතා නැත්තේ වුව ද ඔහුගේ ඇයගේ අදහස හොද නම් එය වැඩි දියුණු කොට ඉදිරියට ගැනීමට එසේ පුලුවන් අය වග බලා ගනිති.

ඒ සියල්ල කරනුයේ කණ්ඩායමේ ජයග්‍රහණය තමන්ගේ ජයග්‍රහණය සමග බද්ධ වී ඇති බැවිනි.

ඒ නිසා කණ්ඩායමට අලාභයක් වෙන්නට ඉඩක් නැත. ලාභයක් වෙන්නට හැම විටම කටයුතු යෙදේ.

ඔවුන් එකිනෙකාට අවමන් කරන්නේ නැත. ඒ වෙනුවට හැම කෙනෙකුටම ගෞරවයක් කණ්ඩායමෙන් ලැබේ. විවේචනය වෙනුවට විචාරය ඔවුන්ගේ තෝරාගැනීම ය. ඒ තුළ හිත රිදීමකට ඉඩක් නැත. ඔවුන් හීනමානයෙන් නොපෙලෙන්නන් බැවිනි.

කැපී පෙනීමේ වුවමනාවක් කිසිවෙකුට නැත. හැම දෙනාම එක් හෝ තවත් ආකාරයක දක්ෂයන් බැවිනි. දිගු කලක් එකට වැඩ කර ඇති බැවිනි. තමන් ගැන දන්නා උදවියට නැවතත් තමන්ව අලෙවි කර ගැනීමට අවශ්‍ය නැති බැවිනි.

ආත්මාරක්ෂාව සදහා බොරු කීමේ වුවමනාවක් ද ඔවුන්ට නැත. වැරදීම්වලට ඉඩ හසර ඇති බැවිනි. වැරදුනේ වුව ද අත්හදා බැලීම් අගය කෙරෙන බැවිනි.

නායකයාගේ හෝ වැඩියෙන් කට හයිය කෙනාගේ පැත්ත ගැනීමට ද ඔවුන්ට අවශ්‍ය නැත. විරුද්ධවීමට වෙනස් මත දැරීමට ඉඩ තිබෙනවා පමණක් නොව එවැනි මත වලට විශේෂ සැළකිල්ලක් ද අගැයීමක් ද ඇති බැවිනි.

විහිළුවලට ඉඩ ඇතත් වැඩ විහිළුවක් කර ගැනීමට කාගේවත් කැමැත්තක් නැත. ඒ වැඩ තුළ ඔවුන්ට සතුටක් තෘප්තියක් ලැබෙන බැවිනි. වැඩම විනෝදයක් වන බැවිනි.

කණ්ඩායම තුළ කල්ලි වලට ඉඩක් නැත. කුමන ගගකින් ආවත් සාගරයට ආපසු එකම ජලය බවට පත්වනවාක් මෙන් කණ්ඩායම තුළ හැම කෙනෙකුටම තමන් පැමිණියේ කුමන පසුබිමකින් ද යන්න නොසළකා එකම ගෞරවය ලැබෙන බැවිනි. ඒ නිසාම යෝජනා ඉදිරිපත් කරන්නේ කවුද යන්න අදාළ නොවේ. අදාළවන්නේ යෝජනාවේ නිවැරදි භාවය ය. ප්‍රයෝජනවත් භාවය ය.

කණ්ඩායම තුල ජේෂ්ඨත්වයට නිශේධනීය බලයක් නැත. පසුබිම පමණක් නොව සාමාජිකයෙකුගේ තාරාතිරම වයස පලපුරුද්ද යන්න ද අදහසක් අගැයීමේ දී වැදගත් සාධකයක් නොවේ. වඩාත්ම හොදම අදහස තෝරාගැනීමට ඒ බෙදීම් බාධාවන බව සාමාජිකයින් දන්නා නිසා ය. වඩාත් වැදගත් වන්නේ තම තමන්ගේ පෞද්ගලික ස්ථානයන් රැක ගැනීම නොව කණ්ඩායමේ ජයග්‍රහණය බව ඔවුන් අවබෝධ කරගෙන ඇති නිසා ය. කණ්ඩායම ජය ලැබුවොත් තමන්ට ද එහි උරුමය හිමිවන බව එහි ප්‍රතිලාභ ලැබෙන බව ඔවුන් දන්නා නිසා ය.

මේ නිසාම කණ්ඩායම් වැඩ පමණක් නොව සාකච්ඡා ද අතිශයින් ඵලදායී ය.

කණ්ඩායම වෙනුවෙන් තම දායකත්වය උපරිමව ලබා දීමට කිසිවෙක් මැලි නොවෙයි. ඒ තුළ නිශ්ශබ්දව සිටින්නන් නැත. මගහැර යන්නන් නැත. ඒ දායකත්වයට අනුව කණ්ඩායම තුළ අගැයීමක් හැම කෙනෙකුගෙන්ම ලැබෙන නිසා ය. කණ්ඩායම වෙනුවෙන් දායකත්වයක් ලබා නොදෙන අයට කණ්ඩායම තුළ දිගින් දිගට රැදීම අපොහොසත් වන නිසා ය. කණ්ඩායම තුළ ඉදිරියට යාමට ඉඩකඩ ඇති නිසා ය.

මේ නිසා ම කණ්ඩායම අතිශය උසස් ප්‍රතිඵල ලගා කර ගැනීමේ සමත් ය.

මෙවැනි කණ්ඩායම්වල ද ඉන්නේ මිනිසුන් ය. වෙනත් කණ්ඩායම්වල නැති හැසිරීමක් මේ මිනිසුන් ප්‍රදර්ශනය කරන්නේ කෙසේ ද? ඒ ලැබෙන නායකත්වය හා මග පෙන්වීම නිසා ය. ආයතනයේ කාලයක් තිස්සේ ගොඩ නගාගෙන ඇති නායකයා විසින් අතිශය වුවමනාවෙන් රකින සෙසු අය විසින් ගරුත්වයෙන් සළකන ආයතනික සංස්කෘතිය නිසා ය. ආයතනයේ ක්‍රමවේද හා ප්‍රතිපත්ති නිසා ය. යාන්ත්‍රණ නිසා ය. ඒවා නැතිව ගිය දාට මේ සාමාජිකයන් ද වෙනත් නිශේධනීය කණ්ඩායම්වල පෙන්වන ලක්ෂණ පෙන්නුම් නොකරනු ඇතැයි සිතීම උගහට ය.

නායකත්වය තීරණාත්මක වන්නේ මේ පසු බිම නිර්මාණය කිරීමේ හා පවත්වා ගැනීමේ හැකියාව ඇත්තේ ඊට බැවිනි.

Advertisements

5 thoughts on “සුපිරි කණ්ඩායමක පසුබිම් කතාව

  1. ශක්තිමත් නායකයෙකුගේ නික්ම යාමේන් බොහෝ විට අදාළ ආයතන  බිඳ වැටෙන්නේ ඇයි? ලංකා ඉතිහාසය ගත්තම හැම ශක්තිමත් රජෙකුට පස්සේ එන්නේ අරාජික කාලයක්.කාණ්ඩායමක පළමු නායකයාව ඉහළින්ම පිළිගත්තත් ඔහුගේ අනුප්‍රතිකයාට විරුද්දතා බහුලව පැන නඟින්නේ ඇයි?

    • ඹබ අසන්නේ වැදගත් ප්‍රශ්නයක්. ශක්තිමත් නායකයෙක් සිටීම ශක්තිමත් ආයතනයක් හැදීමට හේතු විය හැකි බවට සැකයක් නැත. එහෙත් හැම ශක්තිමත් නායකයෙකුම ශක්තිමත් ආයතනයන් හදන්නේ නැත. ශාක්‍යතාවයක් ඇත යන්නෙන් එසේ සිදුවන්නේ යැයි කිව නොහැකි ය. ශක්තිමත් නායකයෙකු තමන්ගේ ශක්තිය ආයතනය මෙහෙයවීමට යොදාගත්ත ද ඔහු ඒ ශක්තිය ආයතනයේ ක්‍රමවේද සකස් කිරීමට යාන්ත්‍රණ සකස් කිරීමට ක්‍රියාවලි සකස් කිරීමට ආචාර ධර්ම ගොඩ නැගීමට සංස්කෘතියක් ගොඩ නැගීමට යොදා ගන්නේ නැතිව වැඩ කාර්යක්ෂමව කිරීමට පමණක් යොදා ගන්නේ නම් ආයතනයේ වැඩ වල ප්‍රගතියක් ඇතිවන නමුත් ශක්තිමත් ආයතන හැදෙන්නේ නැත. තම ශක්තිය වැඩවලට යොදවන නායකයෙකුත් ශක්තිය යාන්ත්‍රණ හා ආයතනය ගොඩ නගන්නට යොදවන නායකයෙකුත් අත් කර ගන්නේ ප්‍රතිඵල දෙකකි. අප බොහෝ දෙනෙක් දැක ඇති ශක්තිමත් නායකයන් සිය ශක්තිය යොදාගෙන ඇත්තේ වැඩවලට ය. ඔවුන් ඉන්නා විට වැඩ කෙරෙන්නත් නැතිවිට වැඩ නොකෙරෙන්නටත් එක් හේතුවක් ඒක ය.

      තවත් කාරණයක් තිබේ. රටක සංස්කෘතිය ආයතනික සංස්කෘතියට බල පායි. රටක සංස්කෘතිය ප්‍රතිගාමී නම් ඒ ලක්ෂණ ආයතන තුලට ද කාන්දු වෙයි. එය වළක්වා ගත හැක්කේ ශක්තිමත් නායකත්වයකට ය. ශක්තිමත් නායකයෙකු ඉවත්ව ගිය පසු ක්‍රමයෙන් අර පසුගාමී සංස්කෘතික ලක්ෂණ නැවතත් ආයතනය වෙතට සේන්දු වෙයි. එය දෙවැනි හේතුව ය.

      • Upali says:

        මමද ඉහත අකාරයේ ශක්තිමත් නායකයෙක් කාලයක් තිස්සේ සිට නික්ම ගිය ආයතනයක කළමනාකරුවෙක් ලෙස පැමිණ තවම සති කීපයකි. මට හැමවිටම මගේ ආයතනයේ සේවකයින් පැමිණිලි කරන කාරණයක් නම්. “අපේ සර් නම් මෙහෙමයි මේක කරේ” යන්නයි. පසුගිය කළමනාකාර මහතා සහ මම මිතුරන් වුවත්, අප දෙදෙනා දෙකකට හිමිකම් කියන්නෙමු. ඔවුන් පසුගිය කළමණාකාර මහතාගේ ප්‍රතිබිම්බයක් ම මගෙන් අපේක්ෂා කරන බව පෙනේ.

  2. Upali says:

    මමද ඉහත අකාරයේ ශක්තිමත් නායකයෙක් කාලයක් තිස්සේ සිට නික්ම ගිය ආයතනයක කළමනාකරුවෙක් ලෙස පැමිණ තවම සති කීපයකි. මට හැමවිටම මගේ ආයතනයේ සේවකයින් පැමිණිලි කරන කාරණයක් නම්. “අපේ සර් නම් මෙහෙමයි මේක කරේ” යන්නයි. පසුගිය කළමනාකාර මහතා සහ මම මිතුරන් වුවත්, අප දෙදෙනා Personality types දෙකකට හිමිකම් කියන්නෙමු (Myers-Briggs). ඔවුන් පසුගිය කළමණාකාර මහතාගේ ප්‍රතිබිම්බයක් ම මගෙන් අපේක්ෂා කරන බව පෙනේ.

    • ඔබේ ගමනාන්තය හා එය කරා ඔබ ගමන් ගන්නට අපේක්ෂිත මාර්ගය ඔවුන්ට දක්වා ඔවුන්ගේ කැමැත්ත ඒ සඳහා ගැනීම අත්‍යවශ්‍ය ය. සමහර විට ඔවුන්ගේ අදහස් ද සැළකිල්ලට ගනිමින් ඒ ගමනාන්තයේ පමණක් නොව මගෙහි ද වෙනස් කම් කිරීමට ඔබට සිදු විය හැකි ය.

      උපාලි, ඔබගේ ප්‍රතිචාරයනේ පෙනී යන්නේ ඔබගේ ගමන් මග හා ඔබ අනුගමනය කරන ප්‍රතිපත්ති පිළිබඳ අදහසක් ඔබේ අනුගාමිකයන්ට නැති නිසා ඔවුන් කලබලයට පත් ව ඇති බවකි. ප්‍රශ්නය ඔබේ වෙනස නොවේ. ඒ වෙනස කුමක් දැයි ඒ තුළ ඔවුන්ගේ අනාගතය ආයතනයේ අනාගතය කුමක් දැයි ඔවුන්ට පැහැදිලි වී නොතිබීම ය.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s